|

චාමර සම්පත් මන්ත්‍රිවරයා අත්අඩංගුවට ගැනීම පාර්ලිමේන්තු වරප්‍රසාද උල්ලංඝනය කිරීමක් ද…? – හිටපු ජනපති රනිල්ගේ විග්‍රහයක්

linkedin sharing button
whatsapp sharing button
messenger sharing button
බදුල්ල දිස්ත්‍රික් පාර්ලිමේන්තු මන්ත්‍රී චාමර සම්පත් පසුගිය දිනක අත්අඩංගුවට ගෙන රිමාන්ඩ් බන්ධනාගාර ගත කළේ ඔහු ඌව පළාත් මහ ඇමතිවරයාව සිටිය දී පළාත් සභාවට අයත් මුදල් එම ගිණුමෙන් ඉවත් කරගෙන වෙනත් ගිණුමකට බැර කළා ය යන චෝදනාව යටතේ ය.
මේ වන විට ඔහු ඇප මත නිදහස් කර සිටින අතර පසුගිය දිනෙක පාර්ලිමේන්තුවට ද පැමිණයේ ය.ඔහු වෙත එල්ල කර ඇති චෝදනා මොනවා ද, එම චෝදනා සම්බන්ධයෙන් මීට පෙර අල්ලස් කොමිසම ලබා දී ඇති තීන්දුව කුමක් යන්න පැහැදිලි කරමින් හිටපු ජනාධිපති රනිල් වික්‍රමසිංහ අද (10) විශේෂ ප්‍රකාශයක් කළේ ය.

චාමර සම්පත් මහ ඇමති සමයේ පළාත් සභා ගිණුම් බැංකු වලින් ඉවත් කර ගත්තේ ආණ්ඩුවෙන් නිකුත් කළ චක්‍ර ලේඛයකට අනුව බව හිටපු ජනාධිපති රනිල් වික්‍රමසිංහ එහිදී පැවසීය.

පළාත් සභා මුදල් තැන්පත් ගිණුම් වල තැබීමට නොහැකි බවට නියෝග කරමින් එවකට මෛත්‍රිපාල සිරිසේන ජනපති සහ අග්‍රාමාත්‍යවරයා ලෙස සිටි තමාගේ අනුදැනුම ඇතිව භාණ්ඩාගාර ලේකම්වරයා අදාල චක්‍රලේඛනය නිකුත් කළ බවද හිටපු ජනාධිපතිවරයා කීය.

මතු දැක්වෙන්නේ හිටපු ජනාධිපති රනිල් වික්‍රමසිංහ, චාමර සම්පත් දසනායකසම්බන්ධයෙන් කළ ප්‍රකාශයයි…

චාමර බැංකුවලින් ගිණුම් ඉවත් කළේ ආණ්ඩුවේ චක්‍රලේඛයකට අනුවයි
චාමර සම්පත් මන්ත්‍රීතුමාගේ පවුලේ සාමාජිකයන් මා මුණගැසුණා. අගමැති ලෙස සිටි සමයේ මෛත්‍රිපාල සිරිසේන ජනපති සමග මගේ අනුදැනුම ඇතිව භාණ්ඩාගාර ලේකම්තුමා එදා චක්‍රලේඛනයක් නිකුත් කළා. පළාත් සභා මුදල් තැන්පත් ගිණුම්වල තැබීමට නොහැකි බවට ඒ චක්‍රලේඛයෙන් කියැවුණා.රජයේ මුදල් මෙන්ම අනෙක් මුදල් ඒ වර්ෂය ඇතුළත වියදම් කරන්නට තිබෙනවා. නැතිනම්  මුදල් අමාත්‍යංශයට හෝ පළාත් සභාවේ මුදල් අමාත්‍යංශයට ඒ මුදල් නැවත දෙන්නට තිබෙනවා. ඒ මුදල් ඉතිරි කරගෙන තැන්පත් ගිණුම්වල තබාගෙන එය පසුව වෙනත් ව්‍යාපෘතිවල යෙදවීම නීති විරෝධී නිසා අප ඒ පියවර ගත්තා. ඒ අවස්ථාවේ චාමර සම්පත් මහ ඇමැතිවරයා මෙන්ම තවත් මහ ඇමතිවරුන් කිහිප දෙනෙක් මට කතා කළා. එය කරන්නට නොහැකි ඇයි දැයි දැනුම් දුන්නා.ඒ අනුව ඔවුන් එම මුදල් තැන්පත් ගිණුම්වලින් ඉවත් කර තිබෙනවා.

ඌව පළාතේ පමණක් නොව සෙසු පළාත්වල ද මේ කටයුතු සිදු කෙරුණා. එමෙන්ම චාමර සම්පත් ඇමතිවරයා මට විටින් විට කතා කරනවා. අධ්‍යාපන ආදී වැඩ කටයුතුවලට මා උදව් කළා. නමුත් අප එකල සිටියේ දෙපැත්තක. චාමර සම්පත් මහ ඇමති ලෙස සිටිය දී සමන්ත විද්‍යාරත්න වත්මන් ඇමතිවරයා පැමිණිල්ලක් කළා. මෙය මගේ වැඩකටයුත්තක් නොවන බවත් එය අල්ලස් කොමිසම සමග සාකච්ඡා කරන ලෙසත්  මා එම කණ්ඩායම්වලට කිව්වා. මහ ඇමතිවරුන්ට පක්ෂ හෝ විරුද්ධ වැඩ කටයුතුවලට මට පැටලෙන්නට බැරි බවත් මා කිව්වා.

කොමිසමෙන් මේ පිළිබඳව විභාග කර තිබෙනවා. ඒ එක විභාගයකින්වත් එතුමා වැරදිකරු ලෙස ඔප්පු වී නැහැ. එතුමා සැකකරුවෙක් ලෙස වත් ප්‍රකාශයට පත් කර නැහැ. මේ විභාග කරගෙන යන්නේ ඒ කාරණා උඩයි. අලුත් චෝදනා හෝ අලුත් සිද්ධි ගැන නොවේ. අනෙක් කාරණය වන්නේ චාමර සම්පත් කට උත්තරය ලබාදෙන විට ම ඔහු අත්අඩංගුවට ගත් බවට නිවේදන නිකුත් කෙරෙනවා. එවැනි දෙයක් කියන්නේ කොහොමද?

චාමර සම්පත් මන්ත්‍රීතුමා පාර්ලිමේන්තුවේ නිතර කතා කරනවා. ඔහු ප්‍රබලව විපක්ෂයේ හඬ නගනවා.මේ ක්‍රියාවලිය පාර්ලිමේන්තුවේ එතුමාගේ මැදිහත්වීමට සම්බන්ධ දැයි විශාල ප්‍රශ්නයක් තිබෙනවා.මා සිතන්නේ එතුමා මේ ගැන පාර්ලිමේන්තුවෙන්ද විභාගයක් ඉල්ලා සිටිය යුතුයි. එය පාර්ලිමේන්තු වරප්‍රසාද උල්ලංඝනය වීමක්දැයි සොයා බැලිය යුතුයි.”

Similar Posts

Leave a Reply

Your email address will not be published. Required fields are marked *