ශ්‍රී ලංකාවේ ආර්ථික වර්ධනය ඍණ වෙයි

 

ශ්‍රී ලංකාවේ ආර්ථිකය 2021 වර්ෂයේ තෙවන කාර්තුවේ දී සෘණ වර්ධනයක්, එනම් පසුබැස්මක් වාර්තා කර ඇති බව ජනලේඛන හා සංඛ්‍යාලේඛන දෙපාර්තමේන්තුව නිවේදනය කරයි.

එම නිවේදනයේ දැක්වෙන්නේ, එම කාලය තුළ දී මෙරට ආර්ථික වර්ධන වේගය සඳහන් වුයේ ඍණ සියයට 1.5ක් ලෙස බවයි.

තවද, 2021 තෙවන කාර්තුව සඳහා ස්ථාවර මිල ගණන් යටතේ ශ්‍රී ලංකාවේ දළ දේශීය නිෂ්පාදිතය රුපියල් මිලියන 2,497,489 දක්වා පහළ ගොස් ඇති බවත් එහි සඳහන් වෙයි.

මේ අතර ආර්ථිකයේ ප්‍රධාන සංරචක ත්‍රිත්වය වන කෘෂිකර්ම, කර්මාන්ත සහ සේවා පවත්නා මිල යටතේ ශ්‍රී ලංකාවේ දළ දේශීය නිෂ්පාදිතයට දක්වනු ලබන දායකත්වයන් පිළිවෙලින් 8.7%ක්, 29.9%ක් හා 57.4%ක් ලෙස දැක්වේ.

එමෙන්ම භාණ්ඩ මත අය කෙරෙන සහනාධාර අඩු කළ බදු සංරචකය 2021 වර්ෂයේ තෙවන කාර්තුවේ දී දළ දේශීය නිෂ්පාදිතයට 4.1%ක දායකත්වයක් ලබාදී තිබේ.

2021 වර්ෂයේ තෙවන කාර්තුවේ දී සමස්ත කෘෂිකර්මික ආර්ථික කටයුතු 1.7%ක සුළු ධන වර්ධනයක් වාර්තා කර ඇත.

එම කාර්තුවේ දී කර්මාන්ත සහ සේවා යන ආර්ථික ක්‍රියාකාරකම් පිළිවෙළින් 2.1%ක හා 1.6%ක ඍණාත්මක වර්ධන වේගයක් වාර්තා කර ඇත.

පසුගිය වසරේ තෙවන කාර්තුවේ දී එම ක්‍රියාකාරකම්වල ධන වර්ධන වේගයන් වාර්තා වී තිබුණු බව ද ජනලේඛන හා සංඛ්‍යාලේඛන දෙපාර්තමේන්තුව නිකුත් කළ නිවේදනයේ වැඩි දුරටත් දැක්වේ.

Leave a Reply

Your email address will not be published. Required fields are marked *