හොරොව්පතාන හූනියම සහ ආණ්ඩුවේ අනාගතය – භාතිය බරුකන්ද

‘‘වෙදදුරන් පසෙක සිටියදී අදිසි බලවේග මත විශ්වාසය තබා රෝග නිරාවරණය කිරීම සඳහා භූතයින්ගේ හෝ දෙවියන්ගේ පිහිට සොයන්නෝද, පොතපත මත නොව දෙවියන් හා පේනකරුවන්ගේ ආධාරය මත පිහිටා විභාග සමත්වීමට උත්සාහ කරන්නෝද, පෙම්වතුන් පෙම්වතියන් දිනා ගැනීමේ මනෝ විද්‍යාත්මක විධික‍්‍රම පසෙක තබා වශීකරුවන් මගින් ආදරය දිනා ගැනීමට උත්සාහ කරන්නෝද, ජනතාව මත නොව ග‍්‍රහයන් හා දෙවියන් වෙත බලාපොරොත්තු තබා දේශපාලනය කරන්නෝද, මෙලොව නොව පරලොවටම ගොස් සැපසම්පත් විඳිමියි සිතා මෙලොව වැඩ නොසලකා සිටින්නෝද, ඇස ගැටෙන, අත ගැටෙන සියලූ පෙනෙන බලවේග අභිබවා නොපෙනෙන බලවේග විසින් කුදුමහත් සියලූ ජීවන කාර්යයක්ම ඉටු කරනු ලබන්නේ යැයි සිතන්නෝද මෙරට බහුල වශයෙන් සිටිති’’ අයි. රණසිංහ පෙරේරා, සමාජ සජීවීකරණය, වෙළුම 01, පිටුව 132,
ඉහග පාඨය උපුටා ගැනීම සිතුණේ පසුගිය සතියේ දේශපාලන ලෝකය කැළඹු තවත් එක් කතාවක් නිසා. කතාව මේ වන විට මුළු ලංකාවම, ඇතැම් විට මුළු ලෝකයම දන්න ජනපති මෛත‍්‍රීපාල සිරිසේන මහතාට හූනියම් කළා කියන කතාව.
මේ කතාව ලංකාවේ ඊනියා ජාතික හා සමාජමාධ්‍යවලට හොඳින් තළුමරන්න පුළුවන් සතියේ කතාවක් බව බැලෑ බැල්මට පේනවා. මොකද මේ සති අන්තයේ සියලූම ජාතික පුවත්පත්වල පිටු භාගයක් මේ කතාවට වෙන් කරලා තිබුණා. ඒ අතර මෑතදී වෙළෙඳපොළට ආව (ඒත් කර්තෘ මණ්ඩලයේ අති බහුතරයක් ලංකාවේ පුවත්පත් කලාව වළපල්ලට දක්කාගෙන යාමට දිවා ? වෙහෙසෙන පැරණි පුවත්පතේම වන * එක්තරා ජාතික පුවත්පතක් මුළු රට වැහෙන්නම පෝස්ටර් ගසමින් මේ හූනියම් කතාවට තවත් වටිනාකමක් දුන්නා. ( මේ පුවත්පත පෝස්ටරය මගින් කියා තිබුණේ ‘මෛත‍්‍රීට හූනියම් කළ කතාවේ සියලූ රහස් හෙළි වෙයි’ කියලා. ඒත් සියලූම පුවත්පත් වාර්තා කරලා තිබුණේ මේ ගැන රහස් පොලීසිය ඇතුළු අංශ ගණනාවක් විසින් තාම පරීක්ෂණ කරනවා කියලා *
ජනපතිගේ ප‍්‍රතිචාරය
හූනියම් කතාවට ප‍්‍රතිචාර දක්වමින් ජනපති මෛත‍්‍රීපාල සිරිසේන මහතා කළ කතාවත් හරිම වැදගත් එකක්. ‘‘පුවත්පත් මුල්පිටුවල ලොකු අකුරෙන් තියෙන්නේ අර අනුරාධපුර පැත්තේ මට හූනියම් කෙරුවයි කියලා සොහොන් පිට්ටනියක තියලා හොයා ගත්ත දේවල්. ඉතිං පොදු අපේක්ෂකයා විදිහට ඒ කාලේ ගහපු ගැහිල්ල තවමත් මාව අභියෝගයක් නිසා තමයි, උඹට බැරිනම් හූනියමක් හරි කරන්න කියලා මේවා කරන්නේ.  අනුරාධපුර හොරොව්පතාන පැත්තේ සොහොන් පිට්ටනියක තිබිලා තමයි මේවා හමුවෙලා තියෙන්නේ. පත්තර කියන විදිහට. ඉතිං හොරොව්පතාන පැත්තේ සොහොන් පිට්ටනියක තිබිලා මේක හමු වුණාම මේ රටේ කවුරුත් දන්නවා කවුද මේක කරලා තියෙන්නේ කියලා. ඉතිං ඒවායින් අපි තවත් ශක්තිමත් වෙන එක තමයි වෙන්නේ’( ජූනි 14 වැනිදා ස්වාධීන රූපවාහනී සේවයේ 35 වැනි සංවත්සරය වෙනුවෙන් එම ආයතන පරිශ‍්‍රයේ සංවිධාන කර තිබූ උත්සවයේදී*
මෛත‍්‍රීපාල සිරිසේන මහතා සාමාන්‍යයෙන් සැලකෙන්නේ මිත්‍යා විශ්වාස වලින් බැහැර වූ පාලකයෙක් විදිහට. ඒ නිසා එතුමා මේ හූනියම් කතාව ලත්තැනම ලොප් කරයි කියලා අපට හිතන්න පුළුවන්.
ඒත් මේ සිදුවීම හරහා යළි යළි ප‍්‍රදර්ශනය වන ‘කෙක්කෙන් බැරි නම් කොක්කෙන් හරි මේ ආණ්ඩුව පෙරළා දැමිය යුතුයි’ කියලා හිතන මහින්දවාදීන්ගේ දේශපාලන සිහිනය නම් මේ සමග නතර වෙයි කියලා හිතන්න බැහැ. මොකද හිටපු ජනපතිවරයාගේ සිට ප‍්‍රාදේශීය සභා මන්ත‍්‍රීවරයා දක්වා, අමාත්‍යාංශ ලේකම්ගේ සිට ගමේ සමෘද්ධි නියාමක දක්වා පසුගිය පාලනය යටතේ වරදාන ලැබූ බොහෝ දෙනෙක් යළි ‘මහින්ද යුගයක් ගැන’ තුන්තිස් පැයේම සිිහින දකින නිසයි. ඒ මහින්ද රාජපක්ෂ හෝ ඔහුගේ කල්ලියේ ආගමනයකින් තොරව ඔවුන්ට පැවැත්කමක් නැති හින්දා. හිතූමතේ ජාතික සම්පත් හා අවස්ථාවක් කොල්ලකෑමට අවස්ථාවක් නැති නිසයි.
මේ හූනියම් කතාව මේ මජර දේශපාලනයේ එක් ප‍්‍රකාශනයක් වශයෙන් නොව එහි සමස්ත කැටි කොට දක්වන තවත් එක් අවස්ථාවක් වශයෙන් අපට සලකන්නේ සිදුවන්නේ මේ නිසයි. යළිත් මේ තත්ත්වය අවධාරණය කළහොත් හූනියම් කරලා නොවෙයි පිල්ලියක් යවලා හරි මෛත‍්‍රී පාලනය අවසන් කරන්න, ඒ තුළ අර්බුද ඇති කරන්න මේ කල්ලිය තව තවත් උත්සාහ කරයි.
හූනියම් දේශපාලනයේ ඉතිහාසය
ලංකාවේ දේශපාලනය තුළ ‘හූනියම් දේශපාලනය’ ගැන විටින් විට කතා කිහිපයක් හමුවෙනවා. ඒ අතර වඩාත් ප‍්‍රකට අවස්ථාවක් වන්නේ හිටපු ජනපතිවරයෙකු වූ රණසිංහ පේ‍්‍රමදාස යුගයයි. තෘණමූල මට්ටමේ (බිම් මට්ටමේ* සිට විධායක ජනපති පදවිය දක්වා පැමිණි පේ‍්‍රමදාස මහතාගේ පාලනය යුගය (1988-1993* සැලකෙන්නේ ලංකාවේ දේශපාලන වංශකතාවේ අතිෂය ගැටුම්කාරී යුගයක් විදිහට. ඒකට හේතු කිහිපයක් තිබුණා. පේ‍්‍රමදාස මහතාට ජනපති අපේක්ෂකත්වය හිමිවුණේ එක්සත් ජාතික පක්ෂයේ ප‍්‍රබලයින්ගේ කැමැත්ත අනුව නොවෙයි. එවකට ජනතා විමුක්ති පෙරමුණ විසින් ඇතිකර තිබූ භීෂණකාරී වාතාවරණය හමුවේ එජාපයේ ජනාධිපති අපේක්ෂකත්වය ලබා ගැනීමට ලලිත් ඇතුලත්මුදලි, ගාමිණි දිසානායක වැන්නෝ අකමැති වූ බවයි දේශපාලන විචාරකයින් කියන්නේ. අනික් පසින් සිරිමාවෝ බණ්ඩාරනායක මැතිණිය නායකත්වය දුන් ශ‍්‍රී ලංකා නිදහස් පක්ෂයත් බලවත් වෙමින් සිටියා. ඒ නිසා 1988 ජනාධිපතිවරණය තිබුණේ එජාපයට දැඩි අවාසි සහගත තත්ත්වයක.
ඒත් ජනතා විමුක්ති පෙරමුණේ භීෂණකාරී වාතාවරණය හමුවේ කෙසේ හෝ එජාපය මැතිවරණයෙන් අසීරු ජයග‍්‍රහණයක් ලබාගත්තා. ඊට පසුව සිදු වුණේ ලංකාව තම ඉතිහාසයේ දැවැන්ත ප‍්‍රචණ්ඩත්වයට, භීෂණයට යොමු වීමයි. පේ‍්‍රමදාස ජනපතිවරයා විසින් ජනතා විමුක්ති පෙරමුණ ඉතා කෲර ආකාරයෙන් මර්ධනය කළා. දකුණේ බලය සහතික කර ගත්තා.
පේ‍්‍රමදාස මහතාගෙන් ලලිත් ඇතුලත්මුලි, ගාමිණි දිසානායක ඇතුළු එජාප ප‍්‍රබලයින්ට නිසිතැන තැබුණේ නැහැ. ඔහු ඔවුන්ව කොන් කළා. අගමැති තනතුර ජ්‍යෙෂ්ඨත්වය නොසලකා ඞී.බී. විජේතුංග මහතාව පත් කළා. මේ සමග එජාප ආණ්ඩුව තුළ දැවැන්ත බල අරගලයක් නිර්මාණය වුණා. ලලිත්-ගාමිණි එක පාර්ශ්වයකට නායකත්වය දුන්නා.
පාර්ලිමේන්තුව තුළත් හූනියම් කරයි
මේ බල අරගල තුළ ජනපති පේ‍්‍රමදාස මහතා පත් වූ දැඩි මානසික පීඩනය තුළ ඔහු මිත්‍යා විශ්වාස වෙත ගමන් කළා. ඒම යුගයේ පැවැති ඇතැම් පුවත්පත් (විකල්ප පුවත්පත්* වාර්තා කළේ ජනපති පේ‍්‍රමදාස මහතා පාර්ලිමේන්තු සභා ගර්භය තුළ පවා හූනියම් කැපූ බවයි. ඒ වගේම කන්‍යාවන් ලවා කිරි දියර නාවා ගැනීම, රත්තරං ඇඳන් පාවිච්චි කිරීම වැනි තවත් මිත්‍යා හා හූනියම් කතා රැුසක් එම යුගයේ රණසිංහ පේ‍්‍රමදාස ජනපතිවරයා වටා ගෙතී තිබුණා.
පේ‍්‍රමදාය යුගය සැලකෙන්නේ මේ හදිහූනියම් ඇතුළු මිත්‍යා විශ්වාසවල කූඨප‍්‍රාප්තිය සිදු වූ යුගයක් ලෙසයි. ඒ වගේම තමයි ජනපතිවරයා මල් වට්ටි ගණන් රැුගෙන පන්සල් ගානේ යන සම්ප‍්‍රදායක් බිහි වුණෙක් මේ යුගයේදීයි. බෝධි පූජා, කිරි අම්මාවරුන්ගේ දාන ඇතුළු සම්ප‍්‍රදායික යාතු කර්ම පවා මේ යුගයේදී රාජ්‍ය අනුග‍්‍රහය හා ආශිර්වාදය මත සිදු වුණ බව කියනවා.
මේ කොහොම වුණත් රණසිංහ පේ‍්‍රමදාස ජනපතිවරයාගේ පාලන සමය නිමා වුණේ අතිෂයින් අවාසනාවන්ත ආකාරයට. අතපිරෙන්න පිරිත් නූල් බැඳ ගෙන, දවස ගානේ මල් වට්ටි අරං පන්සල් ගානේ ගිය ජනපති රණසිංහ පේ‍්‍රමදාස මහතා 1993 මැයි 01 වැනිදා පැවැති මැයි රැුළියේදී එල්.ටී.ටී.ඊයේ මාරාගෙන මැරෙන බෝම්බකරුවකුගේ පහසු ඉලක්කයක් වුණා.
පසුගිය දා ඇති වූ හූනියම් කතාව සමග ඇමැති සජිත් පේ‍්‍රමදාස මහතා කියා තිබුණේ තම පියා මුහුණ දුන් අවාසනාවන්ත ඉරණම වෙනස් කිරීමට මේ කිසිදු බලවේගයකට නොහැකි වූ බවයි.
ලංකා දේශපාලනයේ මිත්‍යා විශ්වාස හා ඇදහිලිවල යළි ඔසවා තැබීම සිදු වුණේ මහින්ද රාජපක්ෂ යුගයේ (2005-2015* බව බොහෝ දෙනා පොදුවේ පිළිගන්නා කරුණක්. පේ‍්‍රමදාස යුගයේ මෙන් මේ සඳහා රාජ්‍ය අනුග‍්‍රහය හා ආශිර්වාදය නොඅඩුව ලැබුණ නිසාත් එම යුගයට වඩා ජනමාධ්‍ය බහුල වීම නිසාත් 2005-2015 සැලකිය හැක්කේ ලංකාවේ මිත්‍යා විශ්වාස යළි ජීවය ලබා සමස්ත සමාජයම ආක‍්‍රමණය කළ යුගයක් වශයෙන්.
පෝතිෂ්‍ය ඉහළට ඔසවා තැබීම
මහින්ද රාජපක්ෂ ජනපතිවරයාගේ යුගයේ සිදු වූ විශේෂිතම සිදුවීමක් වශයෙන් ජෝතිෂ්‍යවේදීන් කිහිප දෙනකු සමස්ත දේශපාලන යාන්ත‍්‍රණය තුළ තීරණාත්මක බලපෑමක් කළ හැකි තත්ත්වයට පත්වීම සැලකිය හැකියි. රාජකීය පෝතිෂ්‍යඥයින් වශයෙන් පිදුම් ලැබූ මෙම පුද්ගලයින් අසීමිත දේශපාලන හා සමාජ වරදාන භුක්තිවිඳිමින් මහින්ද රාජපක්ෂ පාලනය ගැනත්, එම පාලනයේ ආනුභාව සම්පන්න තත්ත්වය ගැනත් නිරන්තයෙන් ව්‍යාප්ත කළ ගොබෙල්ස්වාදී ප‍්‍රචාර සමස්ත සමාජ දේහයම වෙළාගත්තේ මහින්ද රාජපක්ෂ පාලනය ස්ථාවර කිරීමට තවත් මානයක් නිර්මාණය කරමින්.
මැතිවරණ හා තීරණාත්මක තත්ත්වයන් හමුවේ මෙකී ජෝතිෂඥයින් විද්‍යුත් මාධ්‍ය ඇතුළු සමස්ත මාධ්‍ය යාන්ත‍්‍රණයම අසීමිත ආකාරයෙන් භාවිත කළ අතර ඒ සියලූ අවස්ථාවන් හි අවසන් ඉලක්කය වුණේ මහින්ද රාජපක්ෂ පාලනය මතවාදීව ස්ථාවර කිරීම හා එයට අනුහසක් ලබාදීම.
තම පාලනය ස්ථාවර කිරීමට ඇපකැප වූ මෙම පුද්ගලයින්ට හැකි උපරිම ආකාරයෙන් සැලකීමට මහින්ද රාජපක්ෂ මහතා පැකිලූණේ නැහැ. කුප‍්‍රකට ජෝතිවේදී සුමනදාස අභයගුණවර්ධන ජාතික ඉතිරි කිරීමේ බැංකුවේ අධ්‍යක්ෂ මණ්ඩලයට පත් වන්නේ මේ නිසා.
බෝල අතගෑම
පේ‍්‍රමදාස මහතා රත්තරං ඇඳවල් වල නිදාගත්තා වාගේම මහින්ද රාජපක්ෂ මහතා යන යන තැන වශී බෝලයක් අරගෙන ගියා. මේ හරහා ජනතාව වශීකර ගන්න පුළුවන් බවයි ඒ කාලේ ජනතාව කිවුවේ. කතාව ඇත්ත. මහින්ද රාජපක්ෂ මහතා වසර 10 ක් පුරාම මේ රටේ ජනතාවගෙන් සැලකිය යුතු පිරිසක් වශීකර ගන්න පුළුවන් වුණා. ඒත් අවාසනාවට හිටපු යුධ හමුදාපති ජෙනරාල් සරත් ෆොන්සේකා, අගවිනිසුරු ශිරාණි බණ්ඩාරනායක සහ තමන්ගේම පක්ෂයේ මහ ලේකම්, ඇමැති මෛත‍්‍රීපාල සිරිසේන, රාජිත සේනාරත්න, දුම්න්ද දිසානායක ඇතුළු ආණ්ඩුවේ ප‍්‍රබලයින් වශී කර ගන්න ඒ වශී බෝලයට නොහැකි වුණා.
සියතින්ම වළ කපා ගැනීම
‘බොරුවේ අවසානය අපාය’ කියලා ජනතාව කියනවා. කතාව ඇත්ත. බොරු කිව්වාම අපායේ යනවා. බෞද්ධ සාහිත්‍යයේ ප‍්‍රකට චරිතයක් වන ‘චේතිය රජ්ජුරුවෝ’ අපායේ ගියේ බොරු කිවුව නිසා. ඒත් ‘බොරු කළාම අපායේ යනවා කියලා’ කවුරුත් කියන්නේ නැහැ.
ඒත් බොරු කිව්වාම වගේම බොරු කළ විටත් අපායේ යනවා. ජෝතිෂ්‍ය, අණවින කොඩිවිණ මේ සියල්ල අයත් වන්නේ මිත්‍යාවන්ට. මිත්‍යාවන් කියලා කියන්නේ ‘බොරුවලට’
තමන්ට බලයේ සිටීමට තවත් වසර දෙකක් තිබියදී මහින්ද රාජපක්ෂ මහතා 2015 ජනවාරී 08 වැනිදා හදිසි ජනාධිපතිවරණයක් කැඳවන්නේ සම්පූර්ණයෙන් ජෝතිෂඥයින්ගේ උපදෙස් පිට බව අපි කවුරුත් දන්නා කරුණක්. ඊට පසුව සිදු වූ දේත් අපි සියලූ දෙනාම දන්නවා.
කොටින්ම 2015 ජනවාරී 08 වැනිදා පැවැති ජනපතිවරණයේ මහින්ද රාජපක්ෂ මහතාගේ පරාජය වළක්වාලන්න, මේ කිසිඳු ජෝතිෂඥයෙකුට නොහැකි වුණා. තුන්තිස් පැයේම අතගගා හිටිය වශී බෝලයට නොහැකි වුණා. රටපුරා පැවැති කිරි අම්මාවරුන්ගේ දාන, බෝධි පූජාවලට නොහැකි වුණා.
ලංකාවේ මිත්‍යා විශ්වාස හා රාජ්‍ය පාලනය එකිනෙක යැපෙමින් ගමන් කළ යුගයක් අවසන් වුණේ මහින්ද රාජපක්ෂ මහතා ප‍්‍රමුඛ ඔහුගේ කල්ලියට ඛේදවාචකයක් උරුම කරමින්.
කාටත් අමතක මර්වින් සිල්වා
හූනියම් හා දෙවියන් ගැන කතා කරන විට මර්වින් සිල්වාත් අමතක කළ නොහැක්කේ මහින්ද රාජපක්ෂ යුගයේ මේ වැඩ සම්බන්ධයෙන් කප් ගසා සිටි පුද්ගලයින් අතර ඇමැති මර්වින් සිල්වා ද ඉදිරියෙන්ම සිටි නිසයි. අපි කවුරුත් දන්නා ආකාරයට මර්වින් සිල්වාගේ දේවභක්තියේ උපරිමය සලකුණු වුණේ කැළණිය ප‍්‍රදේශයේ සුපිරි තත්ත්වයේ විශ්ණු දේවාලයක් ඉදිකිරීම සමගිනුයි. ඒත් අද මර්වින් සිල්වා ඉන්නේ දේශපාලන කුණු බක්කියටත් වඩා පහත් තැනක. මේ වගේ තවත් කිහිප දෙනක් රාජපක්ෂ ආණ්ඩුව තුළ සිටියා. අද ඔවුන්ට යනඑනමං නැති වෙලා තිබෙන්නේ.
මේ තත්ත්වය තුළ 2015 ජනාධිපතිවරණය කියන්නේ දේශපාලන මිත්‍යාව වගේම ලංකාවේ සමාජය කුරුවල් කළ තවත් මිත්‍යාවන් කිහිපයක් තීරණාත්මකව පරාජව කළ ස්වර්ණමය අවස්ථාවක් වශයෙන් සැලකිය හැකැයි.
එකම දේ තෙවරක් සිදු වීම ඛේදවාචකයක්
එකම වරද දෙවරක් සිදුවීම ප‍්‍රහනයක් ලෙසත් එකම වරද තෙවරක් සිදුවීම ඛේදවාචකයක් ලෙසක් සැලකෙනවා. අද ලංකාව ඛේදවාචකයක් කරා ගමන් කරන්නේ මේ නිසයි.
2015 ජනාධිපතිවරණය අවසන් වූ පසු දේශපාලන වෙනස වෙනුවෙන් තම ඡුන්දය භාවිත කළ ජනතාව සිතුවේ මහින්දගේ පරාජය කෙරෙහි තීරණාත්මක ලෙස බලපෑ මිත්‍යා විශ්වාසවලට දැන්වත් තිත තියයි කියලා. ඒත් ඒක එහෙම නොවන බව අද අපිට  ඕනෑවටත් වඩා පෙනී යනවා. මහින්ද රාජපක්ෂගේ පරාජය සමග හිස සඟවා ගෙන සිටි මේ මිත්‍යා දෘෂ්ටික කල්ලිය යළිත් ඇතැම් විද්‍යුත් මාධ්‍යවල පූර්ණ අනුග‍්‍රහය මත හිස ඔසවමින් සිටිනවා. ඒ බව අපි පසුගිය අවුරුදු නැකැත් ලිත සම්පාදනයේදී වඩාත් මජර විදිහට දැක්කා. දැන් පසුගිය ගං වතුර ගැන සිදුවන පශ්චාත් කතාවලදී යළි යළිත් අවධාරණය වන්නේ මේ කල්ලිය යළිත් ඔස ඔසවන්න දක්වන බලවත් උනන්දුව. මේ තත්ත්වය තුළ ලංකාව යළිත් ගමන් කළ යුත්තේ ඛේදවාචකයක් කරා ම පමණයි. මේ ගැන වඩාත් සවිඥානික වෙමින් මේ ගමන වැළකීමට පියවර ගැනීමයි අද සමාජය හමුවේ පවතින අභියෝගය වන්නේ.
එනිසා පසුගිය දා අනුරාධපුරයේදී සිදු වූ හූනියම් කිරීම අද බොරැුල්ල කනත්තේදීත්, හෙට පාර්ලිමේන්තු සභා ගර්භයේදීත් සිදුවිය හැකියි. මන්ද යළි බලය අල්ලා ගැනීම සියල්ලටම වඩා වැදගත් කොට මෙම කල්ලිය විසින් සලකන නිසයි. ඒ නිසා 2015 ජනපතිවරණ සමයේ මෛත‍්‍රීගේ චරිතය ඝාතනය කරමින් කරගත නොහැකි වූ දේ හෙට මොවුන් විසින් තවත් ආකාරයකින් කළ හැකියි. එය මීට පෙර සඳහන් කළ ආකාරයට කෙක්කෙන් ද කොක්කෙන්ද කියලා කිව නොහැකියි. ඒත් මේ දේවල් අඛණ්ඩව සිදුවන බව නම් සහතිකයි.
අවසාන වශයෙන්
මේ හූනියම් කතාව එක්ක තවත් කතාවක් අවධාරණය කළ යුතුයි. ඒ වත්මන් ආණ්ඩුව ඇතැම් ක‍්‍රියාකාරකම් හරහා විසින්ම හූනියම් කර ගන්නා කතාවයි. අවිද්‍යාත්මක හා හාස්‍ය ජනක කැබිනට් සංශෝධන, ඥානසාර ඇතුළු හනුමා කල්ලිය තමත් නිදැල්ලේ සිටීම, හොරුන්ට හා ඝාතයින්ට දඬුවම් නොදීම, ව්‍යවස්ථා සංශෝධන දිගින් දිගටම පමා කිරීම ඇතුළු  යහපාලන පොරොන්දු ඉටු නොකිරීම හරහා සිදුවන්නේ හූනියම් කළාටත් වඩා වැඩි හානියක් බව ආණ්ඩුව කල් නොයවා වටහා ගත යුතුයි. ඒ වගේම ආණ්ඩුව තුළ හා ආණ්ඩුවේ පත් කිරීම් තුළ හූනියම්වලටත් වඩා භයානක හූනියම් බඳු පුද්ගලයින් සිටින බව ආණ්ඩුව වටහා ගත යුතුයි.
ඒ නිසා හොරොව්පතානේ හූනියම කැපීමට පෙර කවුරුන්ගේ හෝ අදෘශ්‍යමාන හස්තයක් විසින් බැඳ දමා ඇති යහපාලන ආණ්ඩුවේ ජනතාවාදී න්‍යාය පත‍්‍රය යළි පෙරළා බලා ඒවා කඩිනමින් ඉටු කිරීමට ආණ්ඩුව වගබලා ගත යුතුයි. නැතිනම් සිදුවනු ඇත්තේ වත්මන් ආණ්ඩුව බලයට පත් කිරීමට ඡුන්දය දුන් 62 ක් ජනතාවගේ වස් වැඳීම පමණකි. එය හොරොව්පතාන හූනියමට වඩා අති බලවත් බව පමණක් සියලූ බලවතුන් වටහා ගත යුතුයි.
සටහන
භාතිය බරුකන්ද

Similar Posts

Leave a Reply

Your email address will not be published. Required fields are marked *