|

අනුර හමුවේ ඇති ප්‍රශ්නාර්ථය? – රටේ රාළ

” මාලිමාව තුල අනුරට අවධානමක් ” ලිපියෙන් සහ ” යටත්වීම හැර විකල්පයක් අනුරට නැත ” ලිපියෙන් රටේ රාළ කිව්වේ අනුරට ජවිපෙ – මාලිමා ආණ්ඩුව ඇතුලේ අත්වෙන්න පුළුවන් ඉරණම ගැනයි.ගෝඨාභයගේ ආණ්ඩුව අර්බුදයට ගියේ පත්වෙලා අවුරුදු දෙක හමාරකට පස්සේ. ඇත්තටම ගෝඨාභයත් යන්නේ කොහේද, කරන්නේ මොකද්ද කියලා දැනගෙන නෙවෙයි රට පාලනය කළේ.
අනුරත් තමන් දන්න පාර වෙනුවට තෝරගත්තේ නොදන්න පාරක්.ඒ රනිල් කපාපු පාර.අනුර අද ඒ පාරේ යන බව ජවිපෙ මැති ඇමතිවරුත් පවා පිලිගන්නවා.එයාලා කියන්නේ එකපාරට හැරෙන්න බැරි හින්දා මේ පාරේ තව ටිකක් දුර යනවා කියලයි.රනිල් මේ පාරේ ගියේ සියල්ල දැනගෙන.රනිල් පල්ලම,කන්ද,වංගුව,බෝක්කුව ඔය ඔක්කොම දැනගෙන හිටියා.ඒක නිසා රනිල් ඒ පාරේ ලොකූ අමාරුවක් නැතිව ගියා.
රනිල් අවුලක් නැතිව යන බව දැකලා තමයි අනුර මේ පාර තොරගත්තේ.අනුරට මේ පාර තෝරගන්න කියලා බල කරපු පිරිස තමයි මාලිමා කණ්ඩායම.අනුර ඒ පාර තෝරාගත්තට පස්සේ දැන් ඒ කණ්ඩායමෙන් අනුරට ලොකු සහයෝගයක් නෑ.අනුරට දැනට උදව් කරන්නේ රනිල් තියලා ගිය මහින්ද සිරිවර්ධනලා,නන්දලාල් වීරසිංහලා වගේ අය.අනුර මේ පාර තෝරගනිද්දී විශ්වාස කළේ තමන් වටේට ඉන්න උගතුන්, බුද්ධිමතුන් එක්ක ලේසියෙන් ගමන යන්න පූළුවන් වෙයි කියලා වෙන්න ඕනි.
ඒකයි අනුරලා දිගටම රටට පෙන්නන්න හැදුවේ එයාලාගේ පාර්ලිමේන්තු කණ්‌ඩායමේ තමයි වැඩිම උගතුන්,බුද්මතුන් ඉන්නේ කියලා.අනුරගේ කැබිනට් මණ්ඩලය කියන්නේ උගතුන් බුද්ධිමතුන්ගෙන් පිරුණු තැනක් බව පෙන්නුවා. හැබැයි ඒ කිසිකෙනෙකුට බදුල්ලේ චාමර සම්පත්ට තියෙන ප්‍රායෝගික දැනුම නෑ.මාලිමාවේ පාර්ලිමේන්තු කණ්ඩායමට වඩා උගත් බුද්ධිමත් පිරිසක් එලියේ හිටියා.එයාලා අද පේන්නත් නෑ. එළියේ හිටපු තවත් කොටසක් දැන් ජවිපෙට ගහන්න පටන් අරන්.
මේ පිරිස් මාලිමාව වටේට එකතු උනේ හරිනිව ජනාධිපති කරන්න හිතාගෙන.මාලිමාව සහ ජවිපෙ අතර කිසිම එකඟතාවයක් නැතිව අනුර රූපවාහිනී සංවාදයකදී තමන් ජනාධිපති අපේක්ෂකයා කියලා එක පාරටම කිව්වා.ඒ එක්කම මාලිමා කණ්ඩායමේ කොටසක් ආපහු ගියා.හරිනි එක්ක තවත් කණ්ඩායමක් නැවතුනා. අනුරගේ ඉදිරිපත්වීමත් එක්ක හරිනි ජනාධිපති කරන්න ආපු අයට පියවරක් පස්සට ගන්න සිද්ධවුනා.
හැබැයි එයාලට හරිනිව අගමැති ධූරය දක්වා ගේන්න පුළුවන් වුනා.දැන් එයාලා අනුරව මගෑරලා ගිහින්,නැත්තං එලියේ ඉඳන් ජවිපෙට ගහනවා.හරිනි සහ එයාලා අතර තියෙන සම්බන්ධය දිගටම ඒ විදිහටම තියනවා. ඇත්තටම මෙතන ප්‍රශ්නයක් තියනවා.ඒ තමයි මේ මොහොතේ මොකද්ද ජවිපෙට ගහන මේ මාලිමා කණ්ඩායමේ උවමනාව කියන එකයි.රටේ රාළ කියන්නේ පැහැදිලිවම මෙයාලගේ තියෙන්නේ ටාගට් දෙකයි.
එක්කෝ අනුර පුටුවේ ඉන්දැද්දීම යටත් කරලා තමන්ගේ න්‍යාය පත්‍රය ක්‍රියාත්මක කරගන්න. එහෙමත් නැත්තං අනුර පුටුවෙන් බස්සලා හරිනි එතනට ගෙනත් ඒ න්‍යාය පත්‍රය ක්‍රියාත්මක කරගන්න.මේ දෙකෙන් Plan A මොකද්ද,Plan B මොකද්ද කියලා එයාලත් තවම බේරගෙන නෑ. තවමත් ආණ්ඩුව ඇතුලේ ජවිපෙ බලවත්.
හැබැයි මෙයාලා මතවාදීමය වශයෙන් ජවිපෙ දණ ගස්සලා ඉවරයි.ඊළඟට මෙයාලට අනුරගේ චීන සංචරයත් ඉතා වැදගත්.චීන සංචාරයෙන් පස්සේ එයාලාගේ ගෝල් එක මොකද්ද කියලා තීරණය කරයි.ගෝලීයව සහ නැගෙනහිර ආසියාවේදී චිනය මුහුණ දෙන තත්වයත් එක්ක චිනයට දකුණු ආසියාවට ලොකු බරක් දාන්න බෑ.අනුර චීනය පැත්තෙන් යම් සහනයක් බලාපොරොත්තු වෙනවා නම් ඒක මේ වෙලාවේ ප්‍රායෝගිකද කියන ප්‍රශ්නය තියනවා.
අනුර පුටුවේ ඉන්දැද්දීම යටත් වෙනවා නම් අනුරට ඉන්දියානු තෙල් නලය එල්ලන්න එකඟ වෙන්න වෙනවා.ඒ වගේම ඉන්දියානු විදුලි රැහැන් පද්ධතිය අදින්න එකඟ වෙන්න වෙනවා.ETCA ගිවිසුමට යන්න වෙනවා.අනුර දැන් ඉන්දියානු ප්‍රෙෂර් එකට හිරවෙලා ඉන්නේ.ඒ වගේම අනුර අයවැය ඇතුලේ IMF කොන්දේසිවලට හිරවෙලා ඉන්නේ.ඊළඟට සමාජය ඇතුලේ ගොඩනැගෙන දැවැන්ත මහජන පීඩනයටත් හිරවෙලා ඉන්නේ. දැනටමත් මාලිමාවට විරුද්ධව තැනින් තැනින් ජනතාව නැගිටින්න පටන් අරන්.
මෙන්න මේ පීඩනයන් සියල්ල ආවහම අනුර මොනවගේ තැනකට තල්ලු වෙයිද?ඇත්තටම දැනට අනුරට කරදරයක් නැත්තේ විපක්ෂයෙන් විතරයි.අනුර කොහොම හරි චීන සහය අරන් ආවේ නැත්තං වෙන මුවා වෙන්න ගසක් අනුරට නෑ.ඒකත් නැති උනොත් පුටුවේ ඉන්දැද්දී යටත්වීම හෝ ගෝඨාභය පන්නයේ සමුගැනීමක් හැර වෙන උත්තරයක් අනුරට නෑ.රටේ රාළ හිතන්නේ අනුර පුටුවේ ඉඳන් යටත් වෙන්න තියන ඉඩ වැඩියි කියලයි.
මොකද ජවිපෙ ප්‍රතිපත්තිවල ඉඳන් රනිල්ගේ ප්‍රතිපත්තියට මාරුවෙන්න පුළුවන් නම් අනුරට ඉතිරි ටිකත් කරන්න බැරිවෙන්න බෑ.අනුරට ඊළඟට තියෙන Option එක පුටුව දීලා යටත් වෙන එකයි.එහෙම වෙනවා නමි මීට අවුරුදු දෙක හමාරකට උඩදී අපි දැක්ක ඉතිහාසය ආයෙත් අපි ඉස්සරහ ප්‍රතිනිර්මාණය වෙන්න පුළුවන්.එහෙම උනොත් අනුර ජනාධිපතිකමෙන් යයි.අගමැති ජනාධිපති වෙයි.පස්සේ එයා අනුප්‍රාප්තික ජනාධිපති වෙයි.
හැබැයි ඒත් කරන්න වෙන්නේ අර න්‍යාය පත්‍රයම තමයි.ඒක නිසා මේ අයවැයෙන් පස්සේ ගෙවන මාස අට දහය රට ඕනිම පැත්තකට ඇදිලා යන්න පුළුවන්.මේ සියල්ල අස්සේ පොල්පොට් කෙනෙක් බිහිවෙන්නත් පුළුවන්.ඒක නිසා පාර්ලිමේන්තුවේ ඉන්න විපක්ෂයත් පාර්ලිමේන්තුවෙන් පිට නිර්මාණය වෙන විපක්ෂයත් මේ අවුරුද්ද අවසානයේ තීරණාත්මක සටනකට සුදානම් වෙන්න ඕනි.
දැන් විපක්ෂය උනත් තේරුම් ගන්න ඕනි දෙයක් මෙතන තියනවා.නිවැරදි ප්‍රතිපත්තියක් නැතිව ආණ්ඩුව අරන් වැඩක් නෑ.ඒ ප්‍රතිපත්තියට අනුව හදපු වැඩපිලිවෙලක් නැතිව ආණ්ඩුවක් අරන් වැඩක් නෑ.ඒ වගේම ඒ ප්‍රතිපත්තියට එකඟව වැඩකරන්න එකඟ බලවේගයක් නැතිව ආණ්ඩු බලය අරගෙන වැඩක් නෑ.ජවිපෙට සහ මාලිමාවට අද සිද්ධවෙලා තියෙන්නේ ඒක.ඒක ඇතුලේ වෙන වෙන න්‍යාය පත්‍ර ගොඩක් දැන් ක්‍රියාත්මක වෙනවා.
හරි එහෙනම් ගිහින් එන්නම්.
ජයවේවා.
මිට

රටේ රාළ.

May be an image of 1 person and dais

Similar Posts

Leave a Reply

Your email address will not be published. Required fields are marked *