ඉදිරිගාමී මිනිස්සු හා පසුගාමී මිනිස්සු – නිශාන්ත කමලදාස

ඔ්නෑම සමාජයක ඉදිරිගාමී මිනිස්සු මෙන් ම පසුගාමී මිනිස්සු ද සිටිති. එහෙත් ඇතැම් රටක ඉදිරිගාමී මිනිසුන් වැඩි ය. තවත් තැනක පසුගාමී මිනිසුන් වැඩි ය. එයට හේතුව සොයන්නට මත්තෙන් මේ දෙවර්ගය හඳුනා ගැනීම වැදගත් ය.
ඉදිරිගාමී මිනිසුන් නව දෙයට බිය නැත. අභියෝග වලට බිය නැත. නව මං සොයා යෑමට ඔවුන් කැමති ය. නව ප්රදේශ ජය ගන්නට ඔවුන් කැමති ය. නව දේ ඉගෙන ගැනීමට ද නව කුසලතා රැස් කර ගැනීමට ද ඔවුන් කැමති ය.
දිනන්නට ද ඒ වෙනුවෙන් වෙහෙසෙන්නට ද ඔවුන් සූදානම් ය. තමන් පමණක් නොව අනුන්ව ද දිනවන්නට ඔවුන්ට වුවමනා ය.
අතීතය ඔවුන්ට වැදගත් වන්නේ ඒ තුළින් අනාගතයට ඉගෙනීමට ය. නැතිව ඒවා සිහි කරමින් තමන්ට නැති දෙයක් ඇතැයි කියන්නට නම් නොවේ. මෝඩාභිමානයක් ඇති කර ගන්නට නොවේ. ඔවුන්ගේ වැඩි අවධානය වර්තමානයට හා අනාගතයට ය. පසුගාමී මිනිසුන්ට මෙන් අනාගතය ගැන බියක් ඔවුන්ට නැත.
ඔවුන් තමන් විචාරය කරනවාට කැමති ය. විවේචනය කරනවාට වුව කැමති ය. ඒවා තමන් දෙස නැවත හැරී බැලීමට උදව්වක් ලෙස ඔවුහු සලකති. ඒවා හරහා ඔවුහු ඉගෙනීමට වෑයම් කරති. ඔවුන් ඒ ප්රතිචාර වලින් සැලෙන්නේ නැත. ඒවා හිස් මුදුනින් පිළිගෙන ලෝකයට රිසි පරිදි ජීවත් වෙන්නට නම් ඔවුන්ට මොනම ඔ්නෑ කමක් වත් නැත. තමන් දරණ මතය නිවැරදි නම් ඒ මතයට මුලු ලොව ම විරුද්ධ වුව ද ඒ වෙනුවෙන් පෙනී සිටීමට ඔවුන්ගේ පැකිළීමක් නැත. ඒ තමන් නිවැරදි ද යන්න පිළිබඳ ව තවත් වරක් කල්පනා කරමින් ය.
කරුණු සංඛ්යාලේඛන මත පදනම් ව පරීක්ෂණවලට යටත් ව ගොඩ නගා ඇති විද්යාව ඔවුන්ට විශ්වාස ය. සම්ප්රදායික විශ්වාස එකවර ප්රතික්ෂේප නොකරන ඔවුන් කැමති ඒවා ද පරීක්ෂණයට යටත් කිරීමට ය. ඒවා පරීක්ෂණ වලින් අසමත් වන විට ඒවා බැහැර කිරීමට ඔවුන් පසුබට වෙන්නේ නැත. විද්යාත්මක නිගමන පවා නව පරීක්ෂණයන්ගෙන් අසමත් වීමට ඇති ඉඩකඩ ද ඔවුන් බැහැර කරන්නේ නැත. කොටින් ම ලෝකයේ පරම සත්යයක් ඇතැයි ඔවුන් විශ්වාස කරන්නේ නැත.
තමන්ගේ ඉරණම ඇත්තේ තම අතේ බව ඔවුහු සිතති. ඒ ඉරණම වෙනස් කර ගත හැක්කේ ද තමන්ට පමණක් බව ඔවුහු විශ්වාස කරති. ඒ නිසා දෙවියන් අද්භූත බලවේග හෝ වෙනත් බලය ඇතැයි කියන පුද්ගලයන් ඔවුන් සරණ යන්නේ නැත. ඔවුන් ව රැවටීම ඒ නිසා දුෂ්කර ය.
ජාතියකට කුලයකට ආගමකට රටකට වඩා පොදු මනුෂ්යත්වය පිළිබඳ හැඟීමෙන් ඔවුන් මෙහෙය වේ. මේ බෙදීම් කර උඩ තබා ගෙන ඒවා වෙනුවෙන් සෙස්සන් හා සටන් වැදීමට ඔවුහු කාලය මිඩංගු නොකරති. සියල්ලන්ට සහෝදරත්වයේ දෑත් දිගු කරන, මෛත්රියේ කරුණාවේ සිහිල ලබා දෙන, ඔවුන් සමග ගත කරන කාලය පවා සුන්දර අත්දැකීමක් වේ.
මිතුරෙකුගේ දුගුණ ඒ ලෙස දකින්නට මෙන් ම ඒවා පෙන්වා දීමට ද පසුබට නොවෙති. තමන්ට සතුරුකම් කරන්නෙකුගේ වුව සුගුණ ඒ ලෙස දකින්නට ද ඔවුහු මැලි නොවෙති.
ඔවුහු ප්රතිපත්ති ගරුක ය. ඔවුන් කියන දේ කරන, කරන දේ කියන අය ය. ඒ නිසා ඔවුන් සමග ගනුදෙනුව පුද්ගලික න්යාය පත්රයන් නැති මිනිසුන්ට පහසු ය. අලාභයෙන් තොර ය. ඔවුන් සමග ගෙවන හෝරාව වුව ආතතියෙන් තොර ය.
ඔවුන් පහසුවෙන් කෝප ගැන්විය නොහැකි ය. යසස අයස දෙක ම සම ව විඳ ගැනීමට ඔවුන් ඉටා ගෙන ඇති නිසා ඔවුන් මෙල්ල කර ගැනීමට ඇති ආයුධ සීමිත ය.
ඔවුන්ගේ ප්රතිචාරය තියුණු ය. ඍජු ය. කරන ඉදිරිපත් කිරීමක් කරන්නේ හේතු සාධක සහිත ව ය. තර්කානුකූල ව ය. ඔවුන් සමග සංවාදයේ දි පරාජය නියත නිසා ඔවුන් සම්බන්ධයෙන් බොහෝ දෙනෙකුගේ ප්රතිචාර මඩ ගැසීම් වලට හෝ අපහාස වලට සීමා වේ.
වෙනත් ඉදිරිගාමී මිනිසුන් සමග ගැටුමක් සැබෑ ඉදිරිගාමී මිනිසුන්ට නැත. එවැනි අයට අවශ්ය අනුග්රහයන් සැලසීමට ඔවුන් මැලි වන්නේ ද නැත. ඔවුන්ගේ ගැටුම ඇත්තේ පසුගාමී මිනිසුන් සමග ය. ඒ ගැටුම පවා සංවාදයට සීමා කෙරුනු වටපිටාවක පවත්වා ගෙන යෑමට ඔවුන් කැමති ය. පසුගාමී මිනිසුන්ගේ පටු අදහසක් වුව තර්කානුකුලව ප්රතික්ෂේප කරනවා විනා කරුණු සහිත ව පෙන්වා දීමෙන් අවබෝධ කරවන්නට උත්සහ ගන්නවා විනා බලය යොදා යටපත් කිරීමට ඔවුන් කටයුතු කරන්නේ නැත. එවැන්නකට කවුරුන් හෝ ඉදිරිපත් වන්නේ නම් ඊට විරුද්ධව, භාෂණයේ නිදහස වෙනුවෙන්, පෙනී සිටීමට ඔවුන් පසුබට වන්නේ නැත.
සාමූහිකත්වයේ ශක්තිය ඔවුන් අගයන නමුත් ඒ සාමුහිකත්වය තුළ ගිලී යෑමේ අනතුර ද ඔවුහු පසක් කරති. සාමූහිකත්වය විසින් පුද්ගලයා යටත් කර ගැනීමේ ඉඩකඩට ඔවුහු සංවේදී වෙති. ඒ නිසා කණ්ඩායමක සමාජිකයෙකු වුව ද සිය සුවිශේෂ අනන්යතාවය එලෙස ම පවත්වා ගෙන යෑමට ඔවුන් කැමති ය. කණ්ඩායම තුළ ඔහු / ඇය රැඳෙනු ඇත්තේ ඒ තුළ විරුද්ධ වීමට අයිතිය තිබේ නම් පමණ ය. කණ්ඩායම විවේචනයට ඉඩ තිබේ නම් පමණ ය.
පසුගාමී මිනිසුන් සතු ව ඇත්තේ මෙකී ගුණාංග වල ප්රතිපක්ෂය ය. එහි විලෝමය ය.
මිනිසුන් පසුගාමී වීම පිළිබඳ ව හේතු ගණනාවක් තිබිය හැකි මුත් එක් ප්රබල හේතුවක් වන්නේ කුඩා කල ලබන ආදර්ශයන් ය. ඉගැන්වීම් ය. ගුරුහරුකම් ය. නිවසෙන් පාසලෙන් ලබන ආභාෂයන් ය. ඊට අමතරව යම් ප්රජාවකගේ ඉතිහාසය, සම්ප්රදායන් හා සංස්කෘතිය ද මේවාට ඉවහල් වේ. පිදුරු සෙවි කළ පැල්පතේ සාමය ඇතැයි ගී කියන රටක මන්දිර ගොඩ නැගීමට මිනිසුන් පෙළඹෙන්නේ අඩුවෙනි.
පසුගාමී රටවල සංවර්ධනය අතිශයින් මන්දගාමී වන්නේ මේ නිසා ය. අනෙත් අතට සංවර්ධන අව වර්ධිත වීම ආපසු පසුගාමීත්වය පෝෂණය කරන්නක් ද වෙයි. මෙය ඒ නිසා විෂම චක්රයක් ලෙස ක්රියාත්මක වේ. රට ගොඩ ගැනීමට නම් එකා බැගින්වත් මේ පසුගාමිත්වයෙන් මුදා ගත යුතු ය. ඔබට පෞද්ගලිකව ගොඩ යා හැක්කේ ද ඒ පසුගාමීත්වයෙන් මිදීමෙන් ය. ආයතනයක් සම්බන්ධයෙන් වුව ද එහි වෙනසක් නැත. දුර දකින කළමනාකරුවෙකු මේ අවබෝධය ඇතුව වැඩ කරන්නෙකි.
නිශාන්ත කමලදාස
