ටැන්සානියාවත් කොරෝනාවලින් නිදහස් වූ බව නිවේදනය කරයි

නැගෙනහිර අප්‍රිකානු රටක් වන ටැන්සානියාව නව කොරෝනා වයිරසයෙන් නිදහස් රටක් යැයි එරට ජනාධිපති ජෝන් මගුෆුලී නිවේදනය කළේය.

ලොව අර්බුද රැසක් නිර්මාණය කළ ‘කොවිඩ්-19’ ගෝලීය වසංගතයෙන් රට නිදහස් බවත් එහි සාර්ථකත්වයට දෙවියන්ට කෘතඥ විය යුතු බවත් ටැන්සානියානු ජනාධිපතිවරයා උපුටා දක්වමින් එරට මාධ්‍ය වාර්තා කර තිබිණි.

‘‘ටැන්සානියානු ජනතාවගේ යාඥාවලට ස්තූතිවන්ත වන්න අපට කොරෝනා වයිරසය පරාජය කරන්න හැකියාව ලැබුණා’’ යැයි ද ටැන්සානියානු ජනාධිපතිවරයා කීවේය.

‘කොවිඩ්-19’ ගෝලීය වසංගතය පාලනය කිරීම සම්බන්ධයෙන් ටැන්සානියානු ආණ්ඩුව ගත් ක්‍රියාමාර්ග ලෝක සෞඛ්‍ය සංවිධානයේ විමසුමට ලක්ව තිබිණි.

‘‘දෙවියන්ට මුල්තැන දීපු රටක නායකයා වීමට ලැබීම සතුටක් ප්‍රීතියක්. දෙවියන් ටැන්සානියාවට ආදරෙයි’’ ටැන්සානියාවේ ජම්වි රූපවාහිනි නාළිකාව වාර්තා කර තිබිණි.

‘‘ටැන්සානියාවේදී සෑම විටම යක්ෂයා පරාජයට පත්වෙනවා. මොකද ටැන්සානියානුවන් දෙවියන්ට ආදරෙයි. දෙවියන් කොරෝනාව පැරැද්දුවෙත් එම නිසා’’ යැයි ජනාධිපතිවරයා කීය.

ටැන්සානියාවේ ඩොඩෝමා අගනුවර පිහිටි කතෝලික පල්ලයකදී එහි සිටි ජනතාව අමතමින් ජනාධිපතිවරයා ඒ බව කීවේය.

ටැන්සානියාවෙන් අද (9) පස්වරු 3 වනවිට වාර්තා වූ සමස්ත කොරෝනා ආසාදිතයන්ගේ ගණන 509ක් වූ අතර එරටින් වාර්තා වූ මරණ ගණන 21කි.

ඒ.එෆ්.පී./රොයිටර්

Leave a Reply

Your email address will not be published. Required fields are marked *