ඡන්දෙන් පස්සේ ඉන්ධන සීයට තිහකින් ජලබිල් සීයට විස්සකින් ඉහළට ! – වෘත්තීය සමිති

ඉදිරි මහමැතිවරණයෙන් පසුව ඉන්ධන මිල 30%කින් සහ ජල ගාස්තු 20%කින් ඉහළ දැමීමට රජය අනිවාර්යයෙන්ම කටයුතු කරනු ඇති බවට වෘත්තීය සමිති අනතුරු හඟවා සිටී. 

සිවිල් සංවිධාන හා වෘත්තීය සමිති එකමුතුව විසින් ඊයේ (12) රාජගිරියේදී පැවැත්වූ මාධ්‍ය හමුවකදී ඔවුහු මේ බව අවධාරණය කළහ. 

“ලෝක වෙළඳපොලේ අසීමිතව බොරතෙල් මිල අඩුවෙලා තියෙන්නෙ. මිල සූත්‍රය තිබුණා නම් දැන් තියන මිලට වඩා ඩීසල්, පෙට්‍රල් රුපියල් 11කින් අඩු කරන්න පුළුවන්. 

මේ මොහොත වනවිට ආණ්ඩුව 92 ඔක්ටේන් පෙට්‍රල් වර්ගයෙන් රුපියල් 55ක් බදු ගන්නවා. 95 සුපිරි පෙට්‍රල් ලීටරයකින් රුපියල් 68ක් බදු ගන්නවා. සාමාන්‍ය ඩීසල් ලීටරයකින් රුපියල් 15ක් බදු ගන්නවා. සුපිරි ඩීසල් වලින් රුපියල් 35ක් බදු ගන්නවා. 

ඊට අමතරව දැන් මොකද්ද මිල කියන එක එළියට නෑ. මේ වගේම මහින්ද රාජපක්ෂ මහත්තයා 2005 ජුලි මාසෙදි තිබුණු මිල සූත්‍රය නැවැත්තුවා. ඒ සූත්‍රය නවත්තලා ඉන්දීය ලංකා ඔයිල් සමාගමට 8% බැංකු බැඳුම්කරයක් මත රුපියල් මිලියන 11,000ක් ගෙව්වා. ඒ වෙනකොට රජය ගෙවන්න තිබුණා තෙල් සංස්ථාවට මිලියන 34,000ක්. සත පහක් දුන්නෙ නෑ තෙල් සංස්ථාවට. 

මේ නටන්නෙ ඡන්දෙ ඉවර වෙනකල් විතරයි ආණ්ඩුව. ඉන්ධන මිල වැඩිකිරීම සීයට තිහකින්වත් ඉක්මවනවා, වගකීමෙන් කියන්න ජල ගාස්තුව ආණ්ඩුව සීයට විස්සකින්වත් ඉක්මවනවා. ඒකෙ අනතුරු හැඟවීම වාසුදේව කළා ඇමතිවරයා. මේ ජල කප්පාදුව වෙන්නෙ හිඟයට වඩා බ්ලොක් කිරීමක්. හැම තැනම නඩත්තු කිය කියා ජලය කපනවා. එන්න එන්න නියඟය වැඩියි. එන්න එන්න ඉන්ධන භාවිතය වැඩිවෙලා තියෙනවා. ආණ්ඩුව කිසිදු ක්‍රියාමාර්ගයක් අරගෙන නෑ. ඒක හින්දා අපි රජයට බලකරනවා, විනිවිදභාවයෙන් කතා කරන්න, කරුණාකරලා මිල නියාමන කොමිසම පත් කරන්න” යනුවෙනුයි ජාතික සේවක සංගමයේ උප සංවිධායක ආනන්ද පාලිත මහතා එහිදී සඳහන් කළේ. 

RN

LANKANEWSWEB

Leave a Reply

Your email address will not be published. Required fields are marked *