මේ අවනඩුව අසනු – නිශාන්ත කමලදාස

දෙවියන් වහන්සේ මේ විශ්වයේ මැවුම් කරුවාණෝ ය. උන් වහන්සේ සර්ව බලධාරී ය. යහපත් මිනිසුන්ට ස්වර්ගයේ දොර විවෘත කර දෙන්නේ ය. තමන් ගැන විශ්වාස තබන අය රකින්නේ ය. මේ ඔබ වහන්සේ සම්බන්ධයෙන් ඇති සමාජ මතය ය.

එහෙත් ඔබ මේ වගකීම් හරි හැටි ඉටු කරන බවක් පෙනෙන්නට නැත. කොටින්ම නොමිනිසුන් ලෙස මිනිසුන් මැවීම සම්බන්ධයෙන්වත් ඔබ වගකීමක් දැරිය යුතු ය. කියන්නේ නම් සර්වබලධාරී කියා ය. එහෙත් වැඩවලින් නම් එහෙම පෙනෙන්නේ නැත.

මරණයෙන් පසු ඔබ විසින් අපට අත් කර දෙනවා යැයි කියන අපභ්‍රංසයන්ගෙන් අපට වැඩක් නැත. එලොවක් ඇද්දැයි අප හරිහැටි නොදන්නා නිසා ය. මෙලොව කිසි දෙයක් හරි හැටි කරගන්නට අසමත් ඔබ එලොව දී ලබා දෙනවා යැයි කියන දේ විශ්වාස කරන ලෙස කීමට ඔබට අයිතියක් ඇතැයි ද අපි නොසිතමු. ඒ නිසා එලොවක් තිබුණ ද එතැනදී ඔබෙන් අමතර යමක් වෙතැයි විශ්වාස කිරිම අමාරු ය.

ඇතැම් තැනක ඔබ පෙනි සිටින්නේ එකම දෙවියා ලෙස ය. තවත් තැනක තිස් තුන් කෝටියක් සගයින් සමග ය. තව තැනක දිව්‍යාංගනාවන් ද පිරිවරා ඉන්නා සමූහයක් ලෙස ය. තව තැනක ශිව විෂ්ණු ස්කන්ධ කුමාර යන එක් එක් නිශ්චිත නම්වලින් ය. ඇතැම් තැන්වල එක මූණක් ඇතිව ය. තව තැනක මූණු සයක් ඇතිව ය. තව තැනක කිසිදු මූණක් නැතිව ය. ඇතැම් විට රූපයක් පවා නැතිව ය.

රූපයකින් පෙනී සිටින තැන්වල දී ද ඔබේ රූප කාය ගමෙන් ගමට රටින් රටට වෙනස් වන්නේ ය. ලංකාවේ දී ඔබේ පෙනුම ලංකා වැසියකු නොවේ නම් ඉන්දියානුවකුට සම ය. යුරෝපයේ එය වඩාත් කිට්ටු සුද්දන්ට ය. අප්‍රිකාවේ ඔබ සැබෑ ම සැබෑ කල්ලෙකි. මේ වෙනසට හේතුව ඒ ඒ රටවල දේශගුණය ද ඒ ඒ ජනතාව සමග ඔබේ ඇසුර ද යන්න පැහැදිලි නැත.

පොලිසියේ පිහිට

ඔබ බාර ගන්නවා යැයි කියන වගකීම්වල ද නිමක් නැත. තරහ වූවන් සමගි කිරිමට ද නිවාස වාහන හීන සැබෑ කර ගැනීමට ද සිත ගිය පුද්ගලයා වශී කර ගැනීමට ද ,වෛරයක්කාරයින් තොලොංචි කර දැමීමට ද, වාහනය ආරක්ෂා කර දිමට ද, රට ආරක්ෂා කර දීමට ද ලෙඩ රෝග සුව කර දීමට ද කරන ව්‍යාපාර රැකීරක්ෂාවල දියුණුව සලසා දීමට ද විභාග ජය ගැනීමට ද වශයෙන් වන මේ ලයිස්තුව දිග ය. විවිධ ය. සීමාවන්ගෙන් තොර ය.

මේ එකක්වත් ඔබ නිකම් කරන්නේ නැත. ඒ සඳහා පඩුරු පාක්කුඩම් පිළිගැන්විය යුතු ය. ඔබේ අත පිරිමැදිය යුතු ය. කපු මහත්තයාට මුදල් ද දිය යුතු ය. අල්ලස් කොමිසමටවත් මේ අල්ලස් ගැනීම පේන්නේ නැති නිසා ඔබ තවම යහතින් ඉන්නෙහි ය. අලුතෙන් එනවා යැයි කියන අල්ලස් පනතේවත් මේ අල්ලස් අල්ලා ගැනීමට ප්‍රතිපාදනයන් ඇතැයි සිතිය නොහැකි නිසා මේ අලුගුත්තුරු වැඩේ දිගටම ඔබට කර ගෙන යා හැකි ය.

මගේ ව්‍යපාරය දියුණු වේ යැයි මා ඔබෙන් ඉල්ලන විට අල්ලපු ගෙදර මිනිහා ඔබෙන් ඉල්ලන්නේ මා තොලොංචි කර දමන ලෙස ය. මේ දෙන්නාගෙන් ම පඬුරු පාක්කුඩම් කිසි හිරිකිතයක් නැතිව පිළිගන්නා ඔබ මේ දෙන්නාගෙන් කවරකුගේ ඉල්ලීමට සංවේදී වන්නේ දැයි දන්නේ උඩ ඉන්නා දෙවියන්, ඒ කියන්නේ අවසාන වශයෙන් නැවතත් ඔබ ම, පමණ ය.

අප නැති වූ දේ සොයා ඔබ වෙත පැමිණිය ද ඔබේ ම දේවාලයේ කපු මහත්තයා දේවාලයේ යමක් නැති වුණොත් යන්නේ පොලිසියට ය. ඒ කුමන හේතුවක් නිසා දැයි දන්නේ ද උඩ ඉන්න දෙවියන් නැතහොත් ඔබතුමා පමණ ය. කපුවාට නම් විලිලජ්ජාවක් නැතිකම නිසා හෝ නැති වූ බඩුව ගැන තියෙන කෑදරකම නිසා හෝ එසේ කිරීමට හිත් දෙනවා විය හැකි ය. මේ වැඩේ කැත ඔබතුමාට ය. ඔබතුමා මෙසේ නෝන්ඩි කරන කපුවාට දේවාලයේ ඉඩ දීම නිසා බහින්නේ ඔබේ වටිනාකම ය. එය ඔබට නොතේරීම ද පුදුමයකි.

ඔබට විරුද්ධව කටක් හොල්ලන්නට මිනිසුන් බිය ය. ඒ කට වරද්දා ගත්තොත් ඔබ ඔවුනට ඇණයක් වන නිසා ය. එලව එලවා පහර දෙන නිසා ය. හොම්බෙන් යවන නිසා ය. ඒ කතාවේ ඇත්ත නැත්ත කුමක් වුවත් එය දැන් සමාජගතව තිබෙන්නේ ය. ඒ ඔබගේ නියෝජිතයන්ට පින් සිදු වෙන්නට ය.

ඇතැම් තැනක ඔබේ පිළිසරණ පතන අයට සිදු ව ඇත්තේ අපා දුක් විඳීමට ය. කොකුවලින් එල්ලනු ලැබ සිටිමට ය. පිච්චෙන ගිනි ගොඩ උඩින් පන එපා කියා පැන දුවන්න ය. ඒ සියල්ල කරන ලෙස ඔබ විසින් ඔබේ අනුගාමිකයන්ට බල කරන්නට ඇත්තේ ඒ හරහා සෙසු මිනිසුන්ගේ භක්තිය ඔබ වෙත දිනාගන්නට විය යුතු ය. එසේ වුව ද ඒවා නම් පව් වැඩය.

ඒත් කාලෝ ෆොන්සේකා නම් දොස්තර කෙනෙක් මේ වැඩේට අකුලක් හෙලූ බව අපට ආරංචි විණි. ඒ මනුස්සයා දැන් කියව කියව යන්නේ තමන් වසර 80 ක් ජිවත් වුණු නමුත් තමුන්ට කුමන හෝ අගතියක් කරන්නට ඔබ සමත් නොවූ බව ය. ඒ උපහාසය නම් දරා ගන්නට අමාරු ය. ඇත්තටම පොඩි කට වැරැද්දිමකටත් දඩුවම් දෙන ඔබ, ඔබේ පිළිවෙත් සියල්ල ඉවත දමා මස් අනුභව කර අරක්කු බී ගිනි පෑගූ මිනිසාටවත් ඒ සඳහා උන් මෙහෙයවූ කාලෝ ෆොන්සේකා දොස්තරටවත් මුකුත් නොකළේ මන්දැයි මිනිස්සු ඊයේ පෙරේදා කතා කරනු මට ද අසන්නට ලැබිණ.

ඔබ සතුව පඬුපුල් අසුන කියා එකක් තිබුණා යැයි මා අසා ඇත. එහි වාඩි වී සිටින විට පිහිට විය යුතු කිසියම් කෙනකු දුකට අනතුරකට පත් ව ඇත්නම් එය උණුවන බව ද ඒ අනුව ඔබ මෙලොවට බැස ඒ තැනැත්තාට පිහිට වෙන බව ද මා විසින් වැඩිදුරටත් අසා ඇත. සමහර විට ඒ ඉස්සර වෙන්නට පුළුවන. දැන් නම් එහෙම සිදු වන බවක් පෙනෙන්නට නැති නිසා ය. ඇතැම් විට දිගින් දිගට උණුවීම නිසා එය දියව ගොස් වෙනත් අසුනකට මාරු වීමට ඔබට සිදු වුණා වන්නට පුළුවන.

එකක් සම්බන්ධයෙන් නම් මට ඔබ ගැන දුක ය. ඒ අපි නවීන වාහනවලින් ගමන් බිමන් යද්දී, ඔබේම කපු මහත්තැන්ලා ඊටත් වඩා සුපිරි රථවල යද්දී, ඔබ තවමත් මීයකුගේ, ගොනකුගේ, ඒත් නැත්නම් මොනරකුගේ පිටේ යෑම ගැන ය. ඒ පෙර ආත්මයක ඔබ කරන ලද කර්මයක් විය හැකි ය. අපට උදව් පදව් කළා ට තමන්ට එහෙමට දෙයක් කර ගන්නට ඔබට වුවමනා නැති නිසා පෙර පරිදිම මීයාගේ පිටේ යනවා වන්නටත් පුළුවන. ඒත් ඔබට වඳින වාරයක් පාසා මේ ගැන මතක් වී මගේ පපුව හෝස් ගා පත්තු වෙන්නේ ය.

ඔය පරණ බර කරත්ත ඉවත දමා අලුත් කාරෙකක් ගැනීමට හිතුවොත් හොඳ ය. අපේ නම්බුවට වුණත් ඔබ යන වාහනය හොඳ මදි ය. තවමත් මීයකුගේ පිටේ යන කෙනකුට අපිත් වඳිනවා යැයි කීම අපට ද අවනම්බුවකි. ඒ ගැනවත් සලකා ඔය වාහනේ මාරු කර දමන්නට කල්පනා කරන එක හොඳ ය.

උසාවියේ නඩු කතා කළ යුත්තේ නීතිඥයකු හරහා ය. දේවාලයේ දී ඔබ ඇමතීමට කපුමහත්තයෙක් පත් කර ගත්තේ ඒ අනුව ද? අපට ඔබ හා කෙළින් කතා කිරීමට නොහැකිවන සේ කපුවෙකු මැදට ගත්තේ වෙන අහවල් කෙංගෙඩියකට ද? ඕවා සිල්ලර වැඩ ය. ආණ්ඩුවේ කන්තෝරුවල ලොකු මහත්තුරු, පියන්ලා, ලේකම්ලා ඉස්සරහට දමාගෙන කරන්නා වැනි අලුගුත්තුරු වැඩ ය. ඔය ආඩම්බරකම් ඉවත දමා කෙළින් අප සමග කතාවට එන ලෙස අපි ඔබෙන් ඉල්ලමු. ඒ තරමටම කපුමහත්තුරු දැන් අපට එපා වෙලා ය. ඒ හරහා ඔබ ද එපා වීමට කලින් එහෙම වැඩ පිළිවෙළකට ආවා නම් හොඳ ය.

ඇතැම් වෙලාවට අපට හිතෙන්නේ කපුවා ඔබට ද වඩා බලවත් බව ය. අපට කට වැරදුනත් කේන්ති ගන්නා ඔබ කපුවා දේවාලයේ කැත කළ ද අහක බලන බවට කතාවක් ජනතාව අතර ඇත්තේ කපුවාට රිස්සක් කර ගන්නට ඉඩ දී ඔබ ඉවත බලා ගන්නා නිසා ය. ඒ වැඩේ හරි නැත. ඔබට මෙන් ම මිනිසුන්ට ද හොඳ නැත. හොඳක් ඇත්නම් ඒ කපුවාට විතර ම ය. ඒ නිදහසෙන් උපරිම ප්‍රයෝජන ගන්නා ඇතැම් කපුවෝ මිනිසුන් අමාරුවේ දානවා මදිවාට ගෑනුන්වද අමාරුවේ දාන්නෝ ය.

අතරමැදියාගේ වැඩ

කපුවා විතරක් නොව අතරමැදියන් ලෙස කටයුතු කරන පූජකයන්ගේ ද ලොකු වෙනසක් නැත. ළමා අපයෝජනයෙන් පටන් ගෙන බොහෝ අපරාධ වල නිරත වෙන ඔබේ ඇතැම් පූජක නියෝජිතයන් කපුවන්ට කොහෙත්ම දෙවැනි වන්නට සූදානම් නැත. මේ අතරමැදියන්ට හිතුමතේ ජනතාව ගසා කෑමට ඉඩ දීම, ඔවුන් හිංසාවට පත් කරන්නට ඉඩ දීම, ඔබ වැනි දෙවියකුට කොහොමටත් තරම් නොවෙතැයි මගේ වැටහීම ය.

“එය දේව වාක්‍යයක් ලෙස ඇදහිය යුතු නොවේ“ යැයි ඇතැමුන් කියනු මා අසා ඇත. එසේ කියන්නේ අවශේෂ මිනිසුන් කියන දේ ගැන ය. එයින් අදහස් කරන්නේ යමක් කියා ඇත්තේ දෙවියන් විසින් නම් එය වෙනස් නොවිය යුතු බව ය. එය එලෙසම ඇදහිය යුතු බව ය. දෙවියන් කියන දෑ අවශේෂ මිනිසුන් විසින් වෙනස් නොකළ යුතු බව ය. ඔබට ඒසා විශාල බලයක් ඔවුන් දෙන්නේ මොන හේතුවකට දැයි මට සිතා ගන්නට බැරි ය. එයට එක් හේතුවක් නම් ඔබගේ වැදගැම්මකට නැති දෙබිඩි පැවැත්ම ය.

ඔබගේ ඇතැම් වැඩ බලන විට සහ ඔබ ගැන ඇතැම් පූජකයන් කියන දේ අසා සිටින විට, පෙනී යන්නේ ඔබ සාධාරණත්වය ඇති කිරීම වෙනුවෙන් පෙනි සිටින බව ය. ඒ මරණින් මතු ඔබ හා එක්වන්නට හොඳ මිනිසුන්ට අවස්ථාව සලසා දීම හරහා ය. ස්වර්ගයේ දොරටු අධම පව්කාරයින්ට වැහීම හරහා ය. එහෙත් ඇතැම් වැඩ බලන විට පෙනෙන්නේ ඔබ වාචික හා ද්‍රව්‍යමය අල්ලස් ගන්නා බව ය. ඒ ඔබව නො අදහන්නන් නිරයට යැවීමෙන් හා ඔබව වර්ණනා කරන්නන්ට ස්වර්ගය විවෘත කිරීමෙනි. පුදපූජා පවත්වන අයට වැඩිපුර සැලකිමෙනි. පඬුරු පාක්කුඩම් පිරිනමන අයට, යාඥා කරන අයට, අන් අය අභිබවා උදව් කිරිමෙනි. මේ කරුණු විමසන විට අපට පෙනෙන්නේ ඔබ පුහුදුන් මිනිහකුට වෙනස් නැති බව ය. හොඳ තරමට නරක ද ඔබ ළඟ අඩු නැතුව තිබෙන බව ය. එහෙමට ගන්න විශේෂ අටමගලයක් ඔබ ළග නැති බව ය.

හැංගි මුත්තම්

ඔබ තරම් හැංගි මුත්තමේ දක්ෂයෙක් මේ සක්වලම නැත. හැම දෙනාම ඔබ ගැන කතා කරන මුත් ඔබ මුණ ගැසුණු කෙනෙක් සොයා ගන්නට නැත්තේ ඒ නිසා විය යුතු ය. ඇත්තටම අප මුණ ගැසෙන්නට නෑවිත් ඔබ ඔය කරන වැඩේ තේරුම කුමක් ද?

දෙවියන් වහන්ස, දරුණු වසංගතයන්ගෙන්, දුර්භික්ෂයෙන්, සාගතයෙන්, ගංවතුරෙන්, සුනාමියෙන්, මිනිසුන් දස දහස් ගණනින් මිය යද්දී ඔවුන්ගේ ගැලවුම්කාරයා වූ ඔබ සැඟව සිටියේ කොහි ද?

උනුන් පැරදවීම සඳහා යුද්ධ කළ පාර්ශ්වයන්ට මැදිව කිසිදු සම්බන්ධයක් නැති සිවිල් වැසියන් සිය දහස් ගණනින් මිය යද්දි තුවාල ලබද්දී අබ්බගාතයන් බවට පත් වෙද්දී, සාමයේ දූතයා වූ ඔබ හැංගී සුර සැප වින්දේ කොහේ ද?

ත්‍රස්තවාදීන් විසින් උන්ගේ අරමුණු ඉටුකර ගැනීම සඳහා කිරි දරුවන් පවා මරා දමද්දී, අහිංසකයන් ආගමේ නාමයෙන්, ඒ කියන්නේ ඔබේ නාමයෙන්, පරලොව යවද්දී ලොව ම වනසද්දි, දෙවියනි, මිනිසා මැවීමට උනන්දු වූ ඔබ අහක බැලුවේ මොන හිතකින් ද?

සාධාරණත්වයේ ප්‍රතිමූර්තිය

මැරයන් විසින් කාන්තාවන් දූෂණය කරද්දී, ඔවුන්ට අවජාතක දරුවන් දයාද කරද්දී, ඒ හරහා ඔවුන්ගේ මුළු ජීවිතම අඳුරට හෙලද්දී, අහිංසක සුකුමාලියක් ලෙස ගැහැනිය මැවූ ඔබ සිටියේ කොහේද ?මිනිසුන් විසින් මහන්සියෙන් ඉපැයූ දේ සොර සතුරන් විසින් පැහැර ගනිද්දී අපේ ආරක්ෂකයා වූ ඔබ නොදුටු ඇස් ඇති ව නෑසූ කන් ඇතිව සිටියේ කුමන මනසකින් ද?

දරුවන්ට මාපියන් ද මාපියන්ට දරුවන් ද ඇතැම් විට අකාලයේ අහිමි කරමින් ඔබ අපෙන් ඇතැමෙක් පමණක් තෝරාගෙන පරීක්ෂණයට ලක්කරන්නේ මන් ද? හැමට සර්ව සාධාරණ එක පරික්ෂණයක් වෙනුවට අහම්බෙන් තෝරාගත් ඇතැම් අයට සරල පරීක්ෂණත් සෙසු අයට පහසුවෙන් ජයගත නොහැකි අභියෝගතා පරීක්ෂණත් දෙන්නේ කුමන පදනමක් මත හිඳගෙන ද?

ඇත්ත යුක්තිය මුළු වදිද්දී, බොරුව හා අසාධාරණය පිනුම් ගසද්දී, මුළාව හා වංචාව එළිපිට රඟද්දී, දෙවියනි, සාධාරණත්වයේ ප්‍රතිමූර්තිය වූ ඔබ මුණිවත රැක්කේ කෙසේ ද?

ඔබේ නමින් කපුවන් හා පූජකයන් මිනිසුන් මුළා කරද්දී, කප්පම් ගද්දී, ගසා කද්දී ඔබ අහක බැලුවේ කෙසේ ද? වෙන මොකක් නැතත් ඔබේ නමින් කරන ඒ නින්දිත වැඩ ගැනවත් මැදිහත් විමට ඔබ විසින් කටයුතු කළ යුතු ව තිබුණි.

මිනිසා ද ඔබගේ නිර්මාණයක් බව කියන්නේ වුව ද මේ හැංගි මුත්තන් සෙල්ලමෙන් පෙනෙන්නේ ඔබ මිනිසාගේ හිතළුවක් පමණක් බව ය. ඔබ මිනිසා නිර්මාණය කළා නොව මිනිසා විසින් ඔබ නිර්මාණය කරන ලද බව ය.

තවත් ටික කාලයකට නූගත් මිනිසුන්ගේ සිත් තුළ ජිවත් වීමේ භාග්‍යය ඔබට තිබිය හැකි ය. එහෙත් නුදුරු අනාගතයේ දිනක ඔබ ඉතිහාසයට එකතු වීමට නියමිත ය. ඇතැමෙක් කැමති ඔබ ඉතිහාසයේ කුණු බක්කියට තල්ලු කරන්න ය. ඒ ඔබේ ඊනියා නියෝජිතයන්ගේ වැඩ කටයුතු නිසා ය. මම නම් කැමති ඔබ කටුගෙට පිටත් කරවීමට ය. ඒ, අද කුමක් වුව ද, ඔබ මිනිස් ඉතිහාසයේ විශාල කාලවකවානුවක අපේ ජීවිතය සමග බද්ධව සිටි නිසා ය. බොහෝ දේ ගැන අප නොදැනුවත්ව සිටීම හේතුවෙන් අප තුළ වූ බිය යම් පමණකට සමහන් කර ගැනීමට ඔබ ද පිහිට වූ නිසා ය. අද වන විට යල් පැන ගිය, ප්‍රයෝජ්‍ය වටිනාකමක් නැති, එකක් වුව ද කෞතුක වස්තුවක් ලෙස ඔබ සිහිපත් කිරීමට මා කැමති ඒ නිසා ය. ඒ කුමන ක්‍රමයකින් හෝ ඔබ ඉතිහාසයට එක්වන එදවස වැඩි ඈතක් නොවනු දැකීම නම් අපේ එකම පැතුම ය. ඒ ඔබගේ බරින් මිනිසුන් ඉක්මණින් නිදහස් වනු දැකීම අපේ අපේක්ෂාව නිසා ය.

නිශාන්ත කමලදාස

දිනමිණ

 

 

Similar Posts

Leave a Reply

Your email address will not be published. Required fields are marked *